Í dag var þakkardagur fyrir vinaliða haustannar 2018.
Farið var í fimleikahús Ármanns í Laugardal, þar sem tekið var vel á móti hópnum. Fyrst var farið í upphitun og farið yfir nokkrar umgengnisreglur. Að því loknu fengu krakkarnir að leika sér í salnum. Svampgryfjan var vinsæl og mátti sjá krakka taka tvöfalt heljarstökk ofan í hana. Þarna voru líka alls konar stökkbretti, hringir jafnvægisslár og stór trampólín. Þetta var mjög skemmtilegt.
Þess má geta að þjálfarinn sagði að þetta væri besti eða næstbesti hópur sem hann hefði nokkurn tímann fengið í heimsókn. Þessi þjálfari tekur á móti öllum skólahópum sem heimsækja húsið, þannig að við getum aldeilis verið stolt.
Síðan var haldið aftur upp í skóla þar sem Gunnar kokkur hafði matreitt dýrindis pítsur handa svöngum börnum. Í lokin fengu allir vinaliðar viðurkenningarskjal og þeim þakkað fyrir vel unnin störf í morgunfrímínútunum.
Á morgun kl. 13 verður svo fyrsti fundur vinaliða vorannar. Við hlökkum til samstarfsins.
Nú er komið að því að fara að velja nýjan hóp vinaliða.
Vinaliðar haustannar ljúka þessari viku og síðan eru þeir lausir allra mála. Þeir hafa staðið sig einstaklega vel. Það er erfitt að vera frumkvöðull nýs verkefnis eins og vinaliðaverkefnið er, því aðrir nemendur hafa líka þurft tíma til að kynnast verkefninu.
Eins er það alltaf fyrst þannig að þróa þarf verkefnið og breyta og bæta eftir því sem þörf krefur. En við Íris þökkum fráfarandi vinaliðum innilega fyrir góð störf. Framundan er þakkardagur, en nánari upplýsingar um hann koma síðar.
Nemendur 3. - 7. bekkjar eru þessa dagana að tilnefna nýja vinaliða og í framhaldi af því hafa umsjónarkennarar samband heim til að athuga hvort þeir tilnefndu vilji taka verkefnið að sér. Næstkomandi föstudag verður leikjanámskeið í íþróttahúsinu og í næstu viku munum við funda og skipuleggja næstu tvær vikur þar á eftir. Verkefnið fer svo af stað með nýjum vinaliðum mánudaginn 21. janúar.
Vonandi eru allir ánægðir með vinaliðaverkefnið, en við erum alltaf opin fyrir ábendingum um það sem betur mætti fara.
Snemma í nóvember lögðum við fyrir könnun á líðan nemenda í skólanum. Þetta er í 20. skiptið sem þessi könnun er gerð, en hún var fyrst lögð fyrir haustið 1999. Könnunin er stutt og einföld og þykir okkur hún gefa góða mynd af ástandi í hverjum bekk fyrir sig. Niðurstöðurnar eru komnar á heimasíðu skólans ásamt samanburði við fyrri ár. Þar kemur m.a. fram að 78% nemenda í 4. - 10. bekk líður mjög vel eða vel í skólanum og 9% nemenda telja sig vera lögð í einelti. Það er svipað og á árum áður, en áminning um að leita allra leiða til að stöðva einelti.
Í þessari könnun leitumst við að fá nöfn gerenda og þolenda, svo við getum hafist handa, en allt of oft viðgengst einelti án vitneskju okkar; sérstaklega einelti á netinu.
Við viljum brýna fyrir öllum börnum að láta strax vita ef þau halda að um einelti sé að ræða, því allir eru ábyrgir ef þeir vita af eineltinu.
